Balance do traballo da Asemblea Nacionalista de Sober (2012 - 2014)

28 – febreiro – 2012 a 21 de febreiro de 2014

* MOCIÓNS

marzo, 2012 - Moción contra a reforma laboral do PP e ausencia ao Pleno do 29 de marzo de 2012 en solidariedade coa folga xeral convocada para ese día.

xullo, 2012 – Moción para supresión do IBI á Igrexa católica. REXEITADA POLO PP

xaneiro, 2013 – Sobre as participacións preferentes e subordinadas. REXEITADA POLO PP

marzo, 2013 – Para o apoio á manifestación en defensa da área sanitaria de Monforte. REXEITADA POLO PP

maio, 2013 – Contra os recortes na atención á drogodependencia. REXEITADA POLO PP

setembro, 2013 – Pola celebración dunha homenaxe ás vítimas do Franquismo en Sober. APROBADA POR UNANIMIDADE

novembro, 2013 – De solidariedade coas reivindicacións das familias do alumnado de Ensino Especial do Centro Infanta Elena: por un centro de continuidade. APROBADA POR UNANIMIDADE

xaneiro, 2014 – Moción para a creación dun Consello Sectorial de Turismo, para implicar á cidadanía e ao sector no deseño da estratexia turística municipal. APROBADA POR UNANIMIDADE, EN PROCESO DE CREACIÓN

marzo, 2014 - Engádega dun punto a unha moción, que foi aceptado: "garantir que dende o goberno do Estado se garanta o dereito das mulleres a decidir sobre o propio corpo". APROBADA POR UNANIMIDADE

maio, 2014 – Contra a lei de telecomunicacións. REXEITADA POLO PP

setembro, 2014 – Contra o TTIP. REXEITADA POLO PP

agosto, 2014 – Moción conxunta da oposición: petición de pleno extraordinario sobre a situación do Pazo de Sober.

Setembro, 2014 – Pola sinalización de igrexas románicas e petróglifos de Sober. APROBADA POR UNANIMIDADE

* ROGOS

xullo, 2012 – Petición para renuncia de paga extra por parte da Alcaldía, en consonancia cos recortes que o PP aplica ao funcionariado. ACADADO

xullo, 2012 – Pola colocación dun sinal de estreitamento de vía no cruce da panadería de Sober. NON ACADADO

agosto, 2012 – Pola renuncia de toda a corporación ás dietas do pleno extraordinario en solidariedade co sector lácteo. ACADADO

xaneiro, 2013 – Sobre os delitos de corrupción nas contas do PP: petición de dimisión de Rajoy e convocatoria de eleccións xerais. NON ACADADO

febreiro, 2013 – Pleno en apoio ás traballadoras e traballadores do Pazo de Sober. Petición de que toda a corporación renuncie ás dietas do pleno para doalas ao persoal do Hotel en loita por cobrar os seus salarios adebedados (finalmente, ao terse chegado a un acordo: fíxose unha petición para adicar esas dietas a unha causa solidaria; que foi aceptada). ACADADO

abril, 2013 – Pola dotación á Oficina de Información Xuvenil dunha impresora propia. ACADADO

maio, 2013 – Pola celebración dunha asemblea informativa en Neiras para explicar a situación dos límites entre Sober e Monforte e das parcelas privadas vendidas por Monforte a Sigalsa sen coñecemento das persoas propietarias. ACADADO EN PARTE

xullo, 2013 – Por un acto sobre a memoria lingüística nos camposantos (iniciativa de “Galeguizar Galiza”). NON ACADADO

setembro, 2013 – Para que a Xunta considere prioritario un Centro de Día en Sober. NON ACADADO

setembro, 2013 – Rogo para que se sinale o castro da Cividade, cun panel explicativo sobre o castro, situado a pouca distancia do miradoiro da Cividade. ACADADO

xaneiro, 2014 - Que o Concello teña en conta a posibilidade de promover, buscando financiamento en Xunta e Deputación, unha excavación no castro de Sober (ou noutro castro do Concello) recorrendo a persoas voluntarias, imitando proxectos coma a excavación do castro de Mallou, en Carnota. NON ACADADO

marzo, 2014 - Que se envíe á veciñanza o folleto informativo xa preparado sobre as normas de recollida de lixo, especialmente para os grandes vultos, así como os horarios e normas do Punto Limpo. ACADADO

marzo, 2014 - Que se solicite a ADIF a recuperación do muro de peche da estación de Canaval. SOLCITADO, PERO NON ACADADA A RECUPERACIÓN

marzo, 2014 - Que se contemple a colocación de sinais de reducción de velocidade e rugosas en San Martiño, ao ser tramo urbano. NON ACADADO

marzo, 2014 - Que se corrixa a toponimia deturpada nos indicadores do municipio, adoptando as formas oficiais. ACADADO EN PARTE

setembro, 2014 – Pola retirada do proxecto educativo e do regulamento da Escola de Música para adecualos á realidade do Concello, cunha banda de música en funcionamento. ACADADO

setembro, 2014 – Pola priorización do proxecto de saneamento dos núcleos de Neiras. ACADADO EN PARTE

setembro, 2014 – Pola preocupación sobre a situación do hotel Pazo de Sober.

outubro, 2014 – Petición de mellora da laga e fonte do Amendo en Barantes. EN PROCESO

novembro, 2014 – Polo posta en disposición á toda a cidadanía do documento da candidatura da Ribeira Sacra a Patrimonio da Humanidade. NON ACADADO

xaneiro, 2014 – Polo remate do arranxo das humidades da Casa da Cultura. EN PROCESO

* PREGUNTAS

Sobre o estado dos pantaláns do catamarán.

Sobre o proxecto de gasolineira en Sober.

Sobre a ausencia de praza de Información Turística en 2013.

Sobre os servizos de medicina e ATS no Centro da Terceira Idade.

Sobre as condicións de traballo do persoal de incendios.

Sobre as prazas de emprego no verán para desempreados/as mozos/as. Que se publiciten con tempo, usando tamén as redes sociais, para que a mocidade do Concello que está fóra durante o resto do ano poida enterarse.

Sobre os problemas de humidades que sigue a haber na Casa da Cultura.

Sobre o problema das humidades da casa da Escola de Neiras, que deterioran terriblemente o edificio.

Sobre deficiencias puntuais observadas na recollida de lixo.

Sobre as novas portas do Concello.

Sobre a supresión da mesa electoral de Canaval.

Sobre a obra da presa de Canaval, non rematada.

Sobre o campo de tiro autorizado por Medio Ambiente en Doade.

* ACTIVIDADES

maio, 2012 - “Maio revolto”: explicación da reforma laboral e concerto de “música revolucionaria”.

maio, 2012 – Impulso de asemblea comarcal por un novo proxecto común.

xullo, 2013 – Festa comarcal do día da patria.

agosto, 2013 – Reivindicación nacionalista no paso da “Vuelta a España” por Sober.

outubro, 2013 – Xornada “Vivir no país ribeirao”, sobre posibilidades de emprego no rural. Obradoiros de pan, cervexa, olería tradicional e sesión de cata de viño.

abril, 2014 – Participación no acto para redactar unha acta de deslinde de terreos entre Monforte e Sober no Reboredo.

Denuncia do estado do punto limpo de Sober en Canaval.

Recollida de testemuños orais sobre a represión franquista en Sober e mantemento do blogue: https://sober1936.wordpress.com/

outubro, 2014 – Homenaxe institucional ás vítimas do Franquismo.

novembro, 2014 – Colaboración na organización comarcal da concentración en contra da violencia machista.

* DISCURSO (http://sobernacionalista.blogspot.com.es/search/label/temas)

maio, 2012 – Sobre o endebedamento dos concellos para pago a proveedores.

agosto, 2012 – Apoio ao sector lácteo no pleno extraordinario convocado.

decembro, 2012 – Conclusións da xornada “Vivir no país ribeirao”.

febreiro, 2014 – Sobre a candidatura da Ribeira Sacra a Patrimonio da Humanidade.

outono, 2014 - Resumo da situación do hotel Pazo de Sober.

* APOIO A MOBILIZACIÓNS

xuño, 2012 - Manifestación en defensa da Sanidade Pública.

febreiro, 2013 – Manifestación de persoal do Hotel Pazo de Sober.

marzo, 2013 – Concentración en defensa da área sanitaria para Monforte de Lemos.

ASEMBLEA NACIONALISTA DE SOBER

FEBREIRO, 2014

Basta de violencia machista: esiximos máis medios e medidas!

Medio cento de persoas en Monforte esixiu aumento das medidas de prevención e loita contra a violencia machista, coa lectura dun manifesto, que reproducimos a seguir:

Contra a violencia machista: basta de complicidades!

Dende a Asemblea Nacionalista de Sober animamos a toda a cidadanía da comarca de Lemos a difundir e apoiar a concentración en contra da violencia de xénero convocada para este martes, 25 de novembro, ás 19:30 horas na Praza de España de Monforte.

Ademais, a Asemblea Nacionalista de Sober, a través da concelleira non adscrita Paula Vázquez Verao, presentará este xoves no pleno ordinario de Sober unha moción contra a violencia de xénero e reclamando máis medios públicos para a loita contra a mesma.

É a nosa obriga como sociedade manifestar a nosa repulsa ante a violencia contra as mulleres e esixir medidas para rematar con esta lacra.

No contexto dunha crise e de feminización da pobreza, onde a situación de desemprego feminino é a maior causa de retroceso no número de denuncias, é, máis que nunca, imprescindible manifestar a nosa clara oposición fronte a violencia de xénero.

A loita contra o machismo, que se sigue a perpetuar coa axuda de moitas complicidades, é cousa de todos e de todas.

Crónica do acto de homenaxe ás vítimas do Franquismo en Sober

“Na defensa do dereito á vida digna e á democracia, a Corporación Municipal do Concello de Sober fai memoria destes feitos e recoñecemento das vítimas do Franquismo para contribuír a que as xeracións actuais e futuras vivamos nunha sociedade xusta.”

Así comezaba a declaración institucional pronunciada polo alcalde de Sober, Luis Fernández Guitián, na homenaxe ás vítimas do Franquismo realizada o sábado 25 de outubro en Sober, en cumplimento dun acordo plenario de 2013 que, a proposta de Paula Vázquez Verao, concelleira nacionalista non adscrita, decidiu rendir homenaxe e recoñecemento público ás vítimas soberninas do réxime franquista.

Ás 12 da mañá daba comezo en Sober o acto público en memoria das vítimas do Franquismo, cunha sesión simbólica do pleno na que todos os grupos políticos resaltaron o feito de estar realizando un exercicio de “xustiza”, un “recoñecerse a democracia na democracia”. Precisamente, a declaración institucional do Concello de Sober resalta que “a Corporación Municipal de Sober se recoñece na lexitimidade democrática das eleccións de 1936”. O recoñecemento aos representantes públicos represaliados foi recorrente, cunha lembranza especial a Daniel Álvarez Carnero, tenente de alcalde e alcalde gubernativo en 1936, executado en Lugo tras Consello de Guerra, cuxa familia estivo presente na homenaxe.

Posteriormente, iniciouse unha mesa redonda de análise sobre a represión na Galiza post-Alzamento, coa presenza de Carlos Méixome Quinteiro e Xurxo M. Ayán Vila, que reivindicaron a necesidade colectiva de memoria e explicaron, respectivamente, a natureza da “persecución” que o réxime do 1936 perpetrou en Galiza e a “paisaxe presente do Franquismo”, un estado “totalitario que concibe o territorio como “espazo de colonización” e ás persoas e comunidades como “súbditos” ao servizo da plutocracia.

Como peche do acto, a música tivo presenza co grupo “Os Parentes” e coa interpretación por parte dunha sección da Banda de Música de Sober do Himno de Riego, A Marsellesa e o Hino Galego, que puxo ás persoas asistentes en pé.
Carmen García-Rodeja, da ARMH, agradeceu á corporación este exercicio de memoria e lembrou aos alcaldes represaliados da provincia de Lugo. Estivo acompañada do neto do alcalde asasinado de San Tirso de Abres, para reivindicar a necesidade de lembrar ás familias das vítimas e axudarlles na súa búsqueda de verdade e xustiza.
 
A poesía veu da man de Xosé Lois García, que leu o poema “Vitimario de Sober 1936-1940”, e Carmen Blanco e Claudio Rodríguez Fer, que leron sendos poemas, – un deles adicado a María Vázquez Suárez, mestra de Miño asasinada en 1936, cuxa familia era natural de Sober – e trasladaron o apoio da Asociación para a Dignificación das Vítimas do Fascismo, resaltando a necesidade dunha cultura de paz.

A xornada rematou cun xantar de confraternidade ao que asistiu a corporación municipal, as persoas intervintes no acto e familiares de vítimas, así como veciñanza de Sober e contorna.

A declaración institucional, que se pode consultar aquí, remata coas seguintes disposicións:

1. O Concello de Sober recoñece a dor e sufrimento de todas as vítimas da represión, nas súas diferentes modalidades, e restitúe a súa memoria publicamente.  
2. A Corporación Municipal de Sober recoñécese na lexitimidade democrática da Corporación Municipal saída das eleccións de febreiro de 1936.  
3. O Concello de Sober fai un recoñecemento explícito á Corporación Municipal de 1936 e condena que os seus membros fosen afastados das súas funcións polo golpe militar de xullo de 1936 e que fosen asasinados e represaliados de distintas maneiras pola súa ideoloxía e actividade política.

Cea en Sober para falar sobre as municipais

Acordamos facer unha cea-xuntanza aberta para falar sobre as municipais e de problemas municipais.

Como xa temos acordado, nós apostamos por unha candidatura de unidade cidadá, comprometida coa democracia, coa defensa da maioría social e co dereito a decidir do pobo galego; unha candidatura e un programa elaborados directamente pola propia cidadanía.

Esta primeira xuntanza para falar de xeito distendido será o 21 de agosto, ás 21 horas, en lugar por decidir.

Se desexas anotarte á cea, envía correo a nacionalistasober@gmail.com

conclusións: vivir no País Ribeirao, un dereito e unha esperanza de futuro

* As conclusións da xornada práctica Vivir no País Ribeirao, da cal podedes ver crónica e fotos aquí.

Dende Anova do concello de Sober, unha entidade administrativa que  conta con 2.418 habitantes - o 48% maiores de 65 anos -  e unha renda per cápita de 10.954,54 €/ano, debullamos as seguintes problemáticas e propostas concretas de solución.

1. Comarcalización. Precisamos considerar a comarca de Lemos (e a veciña de Caldelas do outro lado do río) coma un todo, con problemáticas comúns, como é a poboación envellecida e a dependencia dos ingresos das pensións, e poñer en marcha dende a Xunta un plan económico para a zona, entendida así en conxunto, centrado no sector primario.

Estamos nun dos vales máis fértiles da península ibérica totalmente por debaixo das súas posibilidades agro-gandeiras, que foi castigado polas políticas da UE a respecto do sector leiteiro. Merece este territorio unha discriminación positiva nos orzamentos da Xunta e a creación dun Polígono Agrario para poñer en marcha empresas de produción agrícola.

Temos que pensar comarcalmente; o absurdo da demarcación provincial viuse co atentado contra a fervenza da Xabrega: a Deputación provincial de Lugo cortou unha fervenza para facer un embarcadoiro do catamarán para non facelo diante do embarcadoiro ourensán, na entrada natural á ribeira dende o río.

Ademais, cómpre un novo modelo de financiamento local, que atenda ás dificultades engadidas do avellentamento e a dispersión da poboación.

2. Servizos sociais para unha poboación con cada vez maior grado de dependencia. Precisamos máis prazas públicas de residencias e centros de día, Sober só dispón dunha residencia privada.

Cómpre activar tamén bancos de tempo, implicando ás asociacións.

3. Máis democracia. Non somos unha reseva natural con nativ*s simpátic*s: cómpre integrar á poboación nos proxectos de futuro desta comarca.

A declaración da Ribeira Sacra como Patrimonio da Humanidade debe conseguirse coa implicación da cidadanía.

Cómpre integrar á poboación na acción institucional, animando á participación da xente nos plenos, á intervención nos plenos de asociacións e colectivos, á constitución de comisións sectoriais no Concello (como a que se creara de Turismo a instancias do nacionalismo)...

4. Ecoloxía. Un dos maiores problemas é o da contaminación de ríos e regatos por falta de saneamento adecuado. É unha débeda histórica coas parroquias de Sober, por parte de Xunta, Deputación e Concello.

Ademais, cómpre concienciar sobre os perigos do abuso dos pesticidas químicos, que das terras da ribeira unhas das máis contaminadas.

5. Medidas concretas: se queremos, podemos!

- sinalización e limpeza dos centos de vertedoiros incontrolados.

- arranxo de fontes públicas.

- Polígono Agrario na comarca de Lemos.

- praza de Educador/a Social en todos os concellos.

- plan de recollida de microtoponimia.

- potenciación dos nosos produtos artesanais nas feiras mensuais das vilas.

- cursos de formación de recuperación de oficios tradicionais: cestería, coiro.

- reactivación da Comisión de Turismo no Concello de Sober.

 

- estreitamento de relacións entre os concellos de ambas marxes do Sil.

- sinalización e mantemento das rutas de sendeirismo.

- restauración das pinturas murais do último cuarto do século XV da igrexa de Pinol.

- adecuación de lugares de baño nos ríos.

- embarcadoiro na Xabrega.

- recuperación do proxecto de viñedo experimental nos Chancís como centro de investigación para a DO Ribeira Sacra.

- preservación das barreiras para a olería de Gundivós.

Crónica da xornada: vivir no País Ribeirao (10-11-2013)

imaxe de Quino Vilas: nos Chancís

O domingo, 10 de novembro, Anova fixo un alto no camiño para achegarse ao noso País Ribeirao. De diversos lugares de Galiza - e da nosa comarca - achegáronse case medio cento de persoas ás que convidamos para coñecer este mundo ribeirao, unha unidade humana e xeográfica, a que conforman as parroquias espalladas a ambas marxes do Sil, sen entenderen de fronteiras provinciais.

Con esta crónica e conclusións aproveitamos para mandarlles o noso agarimo e eterna gratitude: seredes sempre benvidas a Sober!

Tiñamos como obxectivo coñecer mellor o noso entorno, unir ás xentes de alén e aquén Sil, caldelaos e limeses - unión abofé froitífera, da que xa saíron proxectos e intercambios para o futuro -, e reivindicarmos xuntas o dereito á vida, á liberdade e á busqueda da felicidade dende este recanto do mundo. Porque somos de aquí e queremos vivir aquí.

foto: Anova Sober

No contexto dun mundo inxusto e na reivindicación xusta e necesaria doutro mundo posíbel, cun sistema socioeconómico que non remate coa propia esencia do ser humano e coa mesma biosfera, falamos de alternativas á agroindustria, con produción local e ecolóxica, ou ao turismo sen identidade e que non conta coa poboación local, e debullamos posíbeis proxectos de vida en torno aos oficios tradicionais para poder vivir digna e plenamente neste territorio.

Unimos nesta xornada teoría e praxe, metemos as "mans na masa" e no barro, para presentar as nosas reivindicacións concretas para Sober, que non se limitan a ter máis cousas, senón ao ser: porque a política é todo, non a mera xestión, senon o decidir o marco da nosa existencia: sermos mercadoría ou sermos humanidade.

foto: Quino Vilas

Como somos de esquerda, reivindicamos a ética e a liberdade, por iso a xornada de hoxe é un berro liberador en sí mesmo: EXISTIMOS. Esa actitude vital, aquí, neste País Ribeirao esmorecente, non é pouco, é o comezo da conquista das nosas vidas.

E NO PRINCIPIO FOI O PAN

Comezamos a xornada cunha demostración de elaboración de pan ao xeito tradicional feita por Carmen e Ovidio. Tan simple e tan complexo: auga e cereal moído, forno de leña. Dende os inicios da domesticación de prantas e animais e a sedentarización do ser humano, o pan é o alimento do corpo e do espíritu.

Explicáronnos o proceso de levedado e amasado e vimos e colaboramos en facer os bolos de pan e compoñer as empanadas con produtos todos da zona (o cereal, cultivado e moído aquí, o recheo da empanada...). Comprobamos tamén o delicado momento de enfornar, co risco de que o forno perda calor, e fixemos, de paso, unha vixiga ou tripón, dóce tradicional feito con pan, leite, ovos e azucre.

Neste primeiro paso reflexionamos sobre as oportunidades de venda que ten o pan tradicional e a interesante oferta turística que teríamos de facer visitas guiadas prácticas de elaboración de pan e outros produtos tradicionais. Estas actividades deberían ser promocionadas como oportunidades de emprego para xente moza.

Non sen degustar algún dóce e viño da casa, partimos á seguinte parada.

CERVEXEANDO EN SAN MARTIÑO

Coñecimos o proceso de elaboración da cervexa caseira, que vén a ser "unha infusión ao grande".

Diego amosounos e deixounos tocar os ingredientes, os distintos tipos de malte e o lúpulo.

Amosounos o seu taller e moi didacticamente foinos contando paso a paso como se elabora a cervexa na casa, proceso que leva unhas seis horas, para despois fermentar.

Comprobamos no propio padal o exquisita que resulta a cervexa da parroquia de San Martiño en Sober, probando cervexas tipo indian pale ale, irlandesa ou alemá.

Reflexionamos sobre as dificultades que atopamos para vender cervexa caseira, mais considerámolo un produto en auxe e non só unha oportunidade de traballo no rural - que xeraría á súa vez o cultivo de cereais e lúpulo aquí -, senon unha deliciosa alternativa de autoconsumo fronte ás cervexas industriais.

OS CHANCÍS COMO MOSTRA DO PAÍS RIBEIRAO

Nos Chancís tratamos de adentrarnos na alma do noso País Ribeirao, un mundo tronzado polo encoro, que domesticou un río que sempre foi unión, sulcado por pontes e barcas, xunguindo ás xentes de ambas marxes do Sil.

Coñecemos o devir da historia nestas terras e as principais características do viñedo na zona. O Sil encaixouse nunha falla, dando lugar a unha paisaxe de precipicio (máis abrupta e pendente nas zonas graníticas, máis aberta nas pizarrosas), con fortes pendentes nun clima mediterráneo en torno ao río. Foi lugar propicio para o cultivo do viñedo, de cepas curtas, pegadas á terra, con gran insolación, o que produce uvas con gran cantidade de pel, onde está o que lle dará aromas e sabor ao viño. As fortes pendentes propiciaron a proliferación dos socalcos (ou muros, muras, pataos...), un sistema de aterrazamento, espallado por Europa en torno ao ano 1000, que consiste en romper rocha, queimala xunto coa materia vexetal e, co material obtido - xabre - ir aterrazando, para poder aproveitar o sol desas fortes pendentes. De aí xorde un viño - tan ligado á historia de Galiza, produto relacionado co esplendor pleno e baixo medieval das cidades galegas - con personalidade propia, cuxa maior dificultade é o transporte das uvas pola ribeira arriba, sulcada outrora de camiños e hoxe - pese ao impulso acadado dende o inicio do proceso de creación da DO Ribeira Sacra - non totalmente aproveitada.

O País Ribeirao foi un mundo cheo de vida que se tronzou cos encoros, que asulagaron as mellores terras a prezos de saldo e non trouxeron máis que emigración e inxustiza, solucionando os apagóns de Madrid mentras en Chanteiro non se podía prender a televisión ao mesmo tempo cá lavadora.

O castro da Xabrega, a Cova da Vella, o Ciriguilloto do Demo e outros puntos nomeados da paisaxe observábannos.

Nos Chancís, lembramos o atentado á ignorancia e á desmesura que supuxo o tronzar unha fervenza para facer un embarcadoiro en lugar de aproveitar a entrada natural situada a poucos metros; capricho de gobernante de Deputación de Lugo que non podía permitirse facer o "seu" embarcadoiro diante do da Deputación de Ourense. Obra faraónica onde se enterraron millóns e que se inunda cando a choiva persiste. Que chova!

E, grazas ás bandeiras de Anova-Ourense, poidemos decorar a paisaxe e berrar que "Viva Galiza ceibe!"

XANTAR

Tanto ir e vir trouxo un tardío xantar, acompañado de licores caseiros e naturais (ou non tanto).

A NOSA OLERÍA DE RODA BAIXA

Tomás introduciunos no seu taller de Corvelle, Proendos, na idiosincrasia da nosa olería tradicional, a de Gundivós, que se caracteriza por ser feita en roda baixa, movida coa man, e coa técnica de ir construíndo a peza con "cirillotes" de barro. O barro usado é collido na zona, non industrial.

Fíxonos Tomás en directo un xarro, o noso "bigotudo", e ensinounos con outro xa seco como se afuma e se impermeabiliza con resinas.

Pensamos aquí na reivindicación xusta de que as administracións protexan as barreiras onde aínda se colle este barro, para preservar un oficio que é unha xoia da etnografía preservada.

Reflexionamos tamén na necesidade de ter un turismo de altísima calidade, e gastar os cartos das administracións en potenciar oficios coma a olería fronte aos gasto en publicidade. A mellor publicidade á facer as cousas moi ben.

ADESTRANDO OS SENTIDOS: UNHA CATA COMENTADA

Na adega Cividade, de Ramón, a compañeira Laura de Manzaneda adentrounos na apaixoante arte de catar un viño, distinguindo aromas a terra, a froita, a vexetación, a elaboración... 

Quedamos coa reflexión de que un viño da nosa ribeira ten que saber ao País Ribeirao, ten que agochar a esencia da paisaxe e do traballo, a través das variedades propias, coma o albarello, por exemplo, que se utiliza na adega Cividade.

Ao final do camiño, a nosa experiencia resúmese en buscar nos elementos da nosa identidade aqueles que nos permitan construír un mundo humano, facer do País Ribeirao un mundo onde desenvolver a nosa vida e amosarlles o noso "bon vivir" ao resto do mundo.

* Fermosas imaxes de Quino Vilas aquí.

Actividades da xornada: "Vivir no País ribeirao" [horarios e localizacións]

11:15 horas - Punto de encontro en Sober, diante da Casa do Concello. [aquí]

11:30 horas - Presentación da xornada.

11:45 horas - Elaboración de pan, empanada e dóces ao xeito tradicional, con ingredientes de Sober, incluído o grao para a fariña, cultivado e moído na zona.

Daremos forma ao xantar que tomaremos despois e enfornaremos.

No lugar do Ventorrillo, parroquia de Neiras. [aquí]

13:00 horas - Introdución á elaboración de cervexa caseira e degustación.

No lugar de San Martiño, parroquia de Arroxo. [aquí]

14:00 horas - Visita ao entorno dos Chancís. Interpretación do "país ribeirao" e necesidades de Sober no eido do turismo, agricultura e servizos básicos, que se lle entragarán ao grupo parlamentario de AGE a modo de dossier coas necesidades de Sober.

Nos Chancís, da parroquia de Anllo San Martiño, Sober. [aquí]

15:00 horas - Xantar.

No lugar do Ventorrillo, parroquia de Neiras.

[É necesario anotarse ao xantar antes do día 7 de novembro; en anovasober@gmail.com ou no 674473695 - O prezo da xornada son 4 €, que inclúen o xantar]

17:15 horas - Demostración de olería tradicional de Gundivós.

Taller de olería Fígulus en Corvelle, Proendos. [aquí]

* 18:45 horas - Etnografía do viño e da augardente: explicación dun traballo de recollida de datos etonográficos sobre o mundo do viño na zona.

* 19:15 horas - Cata comentada en adega tradicional.

* 20:00 horas - Peche da xornada, conclusións e magosto.

Na adega Cividade, no lugar de Outeiro, parroquia de Bolmente. [aquí]