Solidariedade coas vítimas do accidente de tren en Angrois

 

 

O noso máis sentido pésame ás familias e persoas achegadas ás vítimas do tráxico accidente de tren ocorrido onte. 

 

Tamén, un recoñecemento expreso para os e as traballadoras públicas que atenderon todas as labouras precisas e á inmensa solidariedade do pobo galego que colapsou os servizos de doazón de sangue. 

 

Asemade, un recordo especial para a veciñanza de Angrois, que non dubidou en socorrer inmediatamente ás vítimas. 

 

Lembrade que quedaron suspendidos todos os actos do Día da Patria.

Asemblea de xullo de 2013: preparación de pleno e revista

Na xuntanza da asemblea de Anova de Sober o 18 de xullo, preparamos o pleno ordinario do 29 de xullo, acordamos facer unha revista informativa para setembro e dous actos políticos no último trimestre do ano.

Asemblea de Anova en Sober: xoves, 18 de xullo.

O xoves, 18 de xullo, celebraremos asemblea local de Anova en Sober.

Será ás 9 da noite en Proendos, coa seguinte Orde do Día:

1. Avaliación do traballo feito no concello no pasado ano e iniciativas para os plenos seguintes. [O seguinte pleno ordinario será o a finais de xullo.]

2. Programación de actividades en Sober: revista, charla, plan de desenvolvemento rural.

3. Varios.

Festa do Día da Patria en Monforte o 21 de xullo

“O Día de Galicia son todos”, Lesta Meis.

“A festa maor de Galicia, a festa de todol-os galegos”, Castelao.

Galiza vive momentos de excepción, coa perda de conexións ferroviarias, a privatización da Sanidade pública, o deterioro do ensino no rural, a caída do sector naval, a ruína do sector leiteiro, a extinción das caixas de aforro e a estafa das preferentes... Familias enteiras malvivindo no paro ou dependendo de pensións ridículas ou salarios de miseria mentres sobe o prezo dos produtos básicos, cuns impostos que cargan sobre quen menos ten mentres os defraudadores – ata na propia Familia Real - campan ás súas anchas. Cun goberno que recorta no básico para pagar a débeda ilexítima contraida cos “mercados”.

A nosa comarca de Lemos esmorece sen oportunidades de emprego para a xente moza, sendo este un territorio fértil para os cultivos e fermoso para vivir e visitar.

A única saída é ou a emigración - e eses camiños son transitados por milleiros de xentes mozas – ou que tomemos conciencia da forza do pobo para transformar as cousas.

Dende Anova, seguimos crendo que o chamado de frente ampla que lanzamos o ano pasado polo 25 de xullo segue máis vixente ca nunca; unha fronte ampla contra a barbarie do poder, unha unidade de acción das forzas sociais e políticas, da cidadanía revoltada, contra todo o que nos esmaga, o que non é apenas un reto electoral, senón que se fai día a día entre as xentes “boas e xenerosas”, entre o 90% da sociedade esmagada.

É por iso que dende Anova de Lemos facemos un chamamento á cidadanía que sinta que Galiza ten dereito a decidir o seu futuro nun mundo xusto de pobos libres, a quen sinta que temos dereito a ser felices na nosa Terra, a unha celebración do Día da Patria no que o protagonista sexa o pobo, un pobo consciente de ser nación, e non apenas as expresións políticas do nacionalismo.

Dende Anova de Lemos, queremos contribuír a este obxectivo comezando a organizar para o domingo, 21 de xullo, unha festa do Día da Patria en Monforte de Lemos, aberta a quen desexe participar e colaborar na súa organización. Unha festa onde a protagonista sexa a cultura, os conflictos sociais abertos en Galiza, a música... en definitiva: o pobo soberano.

Unha das actividades será un xantar popular, para o cal hai que anotarse antes do 19 de xullo.

Tanto para colaborar na organización da festa como para anotarse ao xantar, cómpre enviar un correo a asembleadelemos@gmail.com ou chamar aos teléfonos 647576723 // 674473695

Saúde e Terra!

Avanzamos na construción dunha ferramenta política para o novo ciclo histórico: Paula Verao sobre a asemblea de Anova [audio]

Paula Vázquez Verao fala en Radio Principal Ser Monforte sobre a asemblea de Anova, o día despois.

"A asemblea de Anova foi moi intensa, houbo momentos de tensión, outros emotivos e con moito cariño, e foi reflexo da situación de cambio que estamos a vivir a nivel global: as ferramentas que queremos contruír para ese novo ciclo político non é doado construílas, pero avanzamos."

"Seguimos apostando pola creba democrática, que sexa a sociedade civil quen tome as rendas para crear un novo sistema político que solucione os problemas da xente".

"A idea de fronte ampla incluínte debe seguir vixente, tendo Anova a soberanía para reformulala en cada caso, buscando a máxima amplitude posíbel, sempre tendo claro que o noso obxectivo é a transformación social".

"Unha forza política transformadora non pode depender dos cartos das institucións".

Ordenanza da Área de Rehabilitación Integral [pleno - maio 13]

A ordenanza do ARI de Sober pode consultarse aquí.

Aprobouse por unanimidade ceder a parcela do Centro de Saúde ao Sergas.

ROGOS DE PAULA VÁZQUEZ VERAO

* Que se convoque unha asemblea informativa en Neiras para explicar a situación dos límites entre Sober e Monforte e das parcelas privadas vendidas por Monforte a Sigalsa sen coñecemento das persoas propietarias.

Pleno do 29 de maio de 2013: contra os recortes na atención á drogodependencia e na defensa da veciñanza de Neiras afectada pola apropiación de terreos no polígono industrial.

Vista de Monforte e de parte do polígono do Reboredo dende o monte de Neiras.

O 29 de maio hai pleno ordinario en Sober. 

Nesta sesión, tratarase sobre a modificación de distintas ordenanzas municipais (terrazas, ARI, imposto de actividades económicas), modificacións de crédito nos orzamentos e a cesión da parcela do Centro de Saúde ao Sergas.

Ademais, Anova leva ao pleno unha moción denunciando os recortes na atención á drogodependencia, que afecta á Unidade Asistencial de Monforte, que se pode consultar aquí.

Por outra parte, Paula Vázquez Verao solicitará ao goberno local que, dende o Concello, se convoque unha asemblea veciñal en Neiras - en colaboración coa asociación veciñal da parroquia - para explicar a situación do conflicto con Monforte polos lindes do polígono do Reboredo e asesorar á xente afectada pola apropiación por SIGALSA de parcelas particulares para o polígono industrial sen indemnización nin información.

Paula Vázquez Verao